Познати сите детали: Јувентус парите за Роналдо ќе ги добива дури на пет годишни рати!

31 август 2021 - 09:23

Финансиската криза не ги одминува ниту најголемите клубови, поради што Манчестер Јунајтед отштетата за Кристијано Роналдо на Јувентус ќе му ја плаќа на дури пет годишни рати и тоа секоја по три милиони евра.

Сумата од 15 милиони евра може да се зголеми за уште дополнителни осум милиони евра, што зависи од бројот натпревари и освоени трофеи на Португалецот со „ѓаволите“. Оваа информација денеска ја потврди самиот клуб од Торино, кој истовремено емотивно се збогува со својата најголема ѕвезда.

Роналдо мина три сезони во Јувентус и освои низа трофеи, но Јувентус и со негова помош не успеа да стигне подалеку од четвртфиналето на Лигата на шампионите, чие освојување беше примарна цел при ангажманот на португалскиот репрезентативец.