„Не се сомневам дека Роналдо ќе го надмине Пеле“

17 октомври 2019 - 09:47

Еден од најдобрите фудбалери на денешницата, Кристијано Роналдо, успеа да го постигне својот 700. гол во кариерата во поразот на Португалија од Украина (2-1), во рамки на квалификациите за пласман на ЕП 2020 година.

Португалците беа поразени од Украина, која го резервираше билетот на ЕП, а при 2-0, Роналдо успеа само да го намали резултатот на 2-1 во самата завршница кога погоди од пенал.

Неверојатниот Португалец го запиша 700. гол, што е фантастично достигнување. Пред него, сега има само пет фудбалери кои имаат постигнато над 700 гола во своите кариери.

Исто така, на списокот е легендарниот Пеле, кој на официјалните натпревари постигна 767 голови, иако тврди дека тој број е над 1000. На крајот на краиштата, се појави и агентот на Роналдо, Хорхе Мендес, кој е сигурен дека ќе го надмине Пеле многу брзо.

Не се сомневам дека Роналдо ќе го надмине Пеле и ќе биде најдобриот стрелец во историјата на фудбалот. Тој ќе го стори тоа со Јувентус, изјави Мендес за „Тутоспор“.

Роналдо досега има одиграно 974 натпревари во својата кариера на клупско и репрезентативно ниво и успеа да постигне неверојатни 700 гола и да запише 219 асистенции.