Наполитанските медиуми му порачаа на Анчелоти: Елмас повеќе да игра!
После три меча во серија, македонскиот бисер Елиф Елмас повторно заигра, влезе како резерва на местото на Лоренцо Инсиње на 25 минути до крајот, а имаше страшна шанса во која еден сантиметар го спречи да стигне до деби голот. Според наполитанските медиуми заедно со Калиду Кулибали беше најдобар на теренот. Елмас доби слична оценка како и Кулибали, а медиумите од под Везув веќе му испратија порака на Карло Анчелоти дека мора многу повеќе да го користи македонскиот репрезентативец.
„Откако влезе во игра внесе живост и имаше најголема желба на теренот. Очигледно е дека треба да добие многу повеќе простор. Патем Раду спречи феноменално негов погодок“, го анализираа Елмас, медиумите од Неапол после ремито без голови.
И во сите анализи и оценувања, во кои Елмас со Кулибали и Ди Лоренцо се посочени дека единствени биле на ниво, а само македонскиот фудбалер не беше стартер, и дел од стручњаците на телевизиските анализи посочија дека Анчелоти мора повеќе да му дава шанса на фудбалерот за врска.
„Единствена позитивна работа во Неапол беше – влегувањето на Елмас. Тој му даде ритам и континуитет на тимот. Има способност да води, има квалитети, ама досега не е во преден план. И треба да добие шанса, очекувам дека сега уште повеќе ќе биде во фокусот и дека ќе игра во континуитет“, анализира Балцарети за „ДАЗН“.