Ливерпул во очекување: Пауза му се заканува на Ван Дајк

19 ноември 2024 - 09:10

Капитенот на Ливерпул, Вирџил ван Дајк би можел да биде надвор од терените неколку недели ако се остварат најлошите прогнози во врска со неговата состојба.

Тој се повреди на мечот против Унгарија и веќе го напушти кампот на холандската репрезентација која вечерва игра против Босна и Херцеговина. Во текот на денов треба да се знаат повеќе детали на оваа тема и колку, евентуално би отсуствувал искусниот дефанзивец.

„Ван Дајк денеска треба да се појави во тренинг центарот откако го напушти националниот тим на Холандија. Ќе му бидат извршени детални прегледи по што ќе биде јасно за што се работи“, објавија од Ливерпул.

Пред Ливерпул е мошне незгоден период бидејќи по гостувањето кај Саутемптон в понеделник, му претстојат дуели со Реал во Лигата на шампионите и Манчестер Сити во домашното првенство, а потоа и гостувања кај Њукасл и Евертон. Сето ова е на програмата во следните 20-тина дена што значи дека ако се работи за малку посериозна повреда на Ван Дајк, тој ќе ги пропушти сите овие дуели.