Вардарова радост по цел еден месец, Крчмаревиќ дебитираше со триумф со Победа

По цел еден месец без триумф Вардар конечно се врати на победничките патеки откако ја победи секогаш незгодната Ренова со 1-0 со голот на Дејан Блажевски на асистенција на Максим Максимов во 23-та минута од мечот. Вардарци цел еден месец немаа триумф во кој двапати ремизираа, а трипати загубија и патем беа елиминирани во овој период од Купот на Македонија, најмногу и поради сопствениот инает и револт кон ФФМ да експериментират во најлош можен момент, играјќи со младински и комбиниран тим.

Вардар немаше победа од 18 февруари кога ја победи Победа со 3-0, но сега овој триумф ги враќа на победничкиот колосек за да го задрат второто место, но и да направат двоцифрена предност во однос на третиот Силекс, кој загуби кај Шкендија.

Еден гол уште во 16-та минута од мечот на младинскиот репрезентативец до 19 години, Енис Фазлагиќ го реши победникот под Шара за 20-ти сезонски триумф на тетовските црвено-црни и уште еден чекор поблизу до шампионскиот трофеј.

Новиот тренер на Победа, Слободан Крчмаревиќ дебитираше со триумф за првa пролетнa победа на прилепскиот прволигаш Победа, која со 2-0 славеше над Работнички за да освои важни бодови во трката за опстанок. Академија Пандев во судиското продолжение испушти триумф против Пелистер, кој успеа да остане непоразен и да освои бод со ремито 1-1

ПРВА ЛИГА, 24. КОЛО

Вардар – Ренова 1-0 (1-0)

Блажевски 23

Шкендија – Силекс 1-0 (1-0)

Фазлагиќ 16

Академија П. - Пелистер 1-1 (0-0)

Миленковски 47 аг. - Ристевски 93

Победа – Работнички 2-0 (0-0)

Лога 82, Најдовски 94

УТРЕ, 14 ЧАСОТ

Шкупи - Скопје

TАБЕЛА

Шкендија 62, Вардар 46, Силекс 36 (-1), Шкупи 29 (-1), Академија П. 29, Работнички 28, Ренова 25, Победа 25, Пелистер 22 (-1), Скопје 17 (-1).