Српски профи-фудбал: Фудбалери избркани од становите, спијат на – стадионот!?
Последен скандал кој сериозно ја тресе Србија во ек кога има жесток рафал кон федерацијата после неучеството на Евро 2021 е ситуацијата со суперлигашот Мачва, чиј претседател до неодамна беше бившиот голман на Партизан и екс-репрезентативец Ивица Краљ. Краљ го остави клубот, кој сега е на раб на пропаст, а тренерот Драган Аничиќ конечно ја објави невидената голгота на фудбалерите.
„Јас одамна се зареков дека нема да зборувам за проблемите со кои се соочуваме веќе долго време и дека ќе се фокусираме исклучиво на теренот, ама сега сум приморан тоа ветување да го прекршам. Наместо ситуацијата да се поправа, нам од недела во недела ни е сѐ полошо. Пред неколку дена, дел од првотимците, зашто не е платена киријата за становите, останаа без сместување. Бараа да ги сместиме на стадионот. Тоа толку ме потресе и како човек и како тренер, ама истовремено сум горд зашто фудбалерите сѐ ќе дадат и спремни се да се жртвуваат за заедничкиот успех. Кога во највисокиот ранг немаме елементарни услови, зарем треба да зборуваме за резултати, игри. И нормално, има ветувања дека ситуацијата ќе се поправи, ама сѐ останува само на тоа – ветувања“, вели Аничиќ.
Мачва е претпоследна со осум бода од 15 досегашни мечеви во Суперлигата на Србија.