Поминаа два месеца од суспензијата на Синер, сега може нормално да тренира

05 април 2025 - 08:44

Веројатно немало побезболна суспензија од онаа на Јаник Синер кој, извесно е, ќе се врати на терените како лидер на АТП листата, со висока предност пред ривалите, но и далеку поодморен во однос на нив.

Поминаа првите два месеца од казната, остана уште еден, но според одлуката за суспензија, од денеска ќе може да почне нормално да тренира. Во првите два месеца, со него можеа да бидат само кондициските тренери и физиотерапевтите, смееше да тренира само во приватни клубови и да игра само со платени спаринг партнери. Сега се се менува бидејќи може да тренира со својот тренер и да се подготвува за првиот следен турнир - Мастерот во Рим.

„Добро сум, добро се одморив и среќен сум. Правев многу работи кои не можев претходно. Се разбира, да можев да бирам, ќе го изберев тенисот, но сега не размислувам за тоа. Тренирав сам, се подготвував и се чувствувам одлично физички и психолошки иако има уште многу време до враќањето“, рече Синер.

На сезоната на земја, лани освои само 450 бода, а не брани многу ни во Рим и „Ролан Гарос“, па извесно е дека барем до Вимблдон ќе остане на чело на АТП листата. Во моментов има речиси 3.000 бода повеќе од второпласираниот Зверев, околу 4.000 бода пред третиот Карлос Алкараз и околу 6.000 од петтопласираниот Ѓоковиќ.