Полска ја здроби Белорусија, Исланд во завршницата ја совлада Холандија

16 јануари 2022 - 22:12

Полска вечерва ја запиша втората победа на Европското првенство (ЕП) во ракомет, откако ја совлада репрезентацијата на Белорусија со убедливи 29-20, додека Исланд во тежок натпревар беше подобар од Холандија со 29-28.

Белорусија го постигна првиот гол на мечот и тоа беше единствено водство за нив во текот на целата средба. Полска веднаш потоа влезе во серија од 5-0 и избега на 8-3, по што беше јасна нивната намера да дојдат до втора победа и пласман во следната фаза.

Полјаците во завршницата од второто полувреме повторно направија голема серија од 7-0 и со тоа го декласираа противникот, кој до крајот успеа да намали на 20-29.

Крајевски беше најефикасен во екипата на Полска со седум погодоци, додека Ваилупау постигна пет гола на спротивната страна.

Исланд имаше водство во текот на целиот натпревар против Холандија, а на средината на вторите 30 минути нивната предност изнесуваше и пет разлика (22-17), но ривалот се врати и го внесе мечот во возбудлива завршница, каде што Исланѓаните беа подобри со 29-28.