„Не ги провоцирајте Грците - навивајте за Охрид и за Македонија!“

01 април 2026 - 15:13

Ракометарите на Охрид славеа победа против Олимпијакос од 31-25 на гости во Атина и се наоѓаат пред пласман во полуфиналето од ЕХФ Европскиот куп, сепак треба да се одигра и реваншот на кој ќе бидат домаќини.

Пред овој натпревар од редовите на Охрид испратија апел до сите кои ќе бидат во салата „Билјанини Извори“ да навиваат без провокации кон грчкиот состав.

„Почитувани охриѓани, симпатизери, навивачи и љубители на ракометот!

ГРК Охрид за градот од коло во коло на Европската сцена пишува историја! Одигравме одличен натпревар во Атина и се вративме како победници. Но, имаме уште 60 минути на домашен терен.

Бевме одлично примени од екипата на Олимпијакос и натпреварот помина во одлична ракометна атмосфера. Ја повикувам публиката, симпатизерите и навивачите во сабота да бидат 8-от играч на ГРК Охрид и ветер во грб на нашите гладијатори. Ве молам со фер и најкоректно навивање и поддршка за нашите момци да му помогнете на клубот. Транспарентите во преполната сала Билјанини Извори да бидат исклучиво за поддршка на нашиот клуб и Македонија, да ја оставиме политиката настрана и да му помогнеме на нашиот град да испишува историја! Со почит, Спортски директор Славчо Ристески“, стои во објавата на социјалните мрежи.

Ќе потсетиме, како на натпреварот во Атина, така и на дуелот в сабота забрането е присуство на гостински навивачи.