Јакимовски со убедлива победа дебитираше во новиот тим

05 ноември 2024 - 08:46

Откако во текот на летото го смени колеџот, Андреј Јакимовски го забележа своето деби за новиот тим, Колорадо Бафалос.

Во првиот меч, неговата екипа славеше убедлив триумф против Источен Вашингтон со 76-56 и тоа благодарение на подоброто второ полувреме. Гостите многу силно го почнаа натпреварот, на средина од првиот дел имаа водство и од 18 поени разлика (24-8), а предноста ја задржаа по воведните 20 минути, само што таа не беше толку висока (31-25).

Второто полувреме донесе сосема поинаква слика на теренот и покрај тоа што Источен Вашингтон го одржуваше водството уште долго време. Клучна беше серијата од 12-0 по која домашниот тим поведе со 58-47, а на крајот излезе убедлива победа, со 20 разлика.

Јакимовски на теренот помина 28 минути и за тој период постигна 11 поени, 7 скока, 3 украдени топки и 2 асистенции за да го комплетира одличниот впечаток на своето деби во тимот на Колорадо.