АМС контра ФФМ: Незаконски е да се менуваат боите на националните селекции!

01 јуни 2021 - 15:42

Поранешниот македонски ракометар, а сега директор на Агенцијата за млади и спорт (АМС), Наумче Мојсовски во разговор со „Студио 10“ на „ТВ24“ зборуваше за промената на боите на дресот на македонската фудбалска репрезентација.

Мојсовски вели дека е незаконски да се менуваат боите на националните селекции и дека македонски се црвената и жолтата боја, а не бордо и црната боја во кои требаше да бидат дресовите на фудбалерите на Европското првенство (ЕП).

„За дресовите постојат закони. Се знаат боите во сите репрезентации, има црвена и жолта боја. Незаконски би било да се вметне било каква друга боја. Федерацијата сама ги одредува боите, но по реакцијата на јавноста, тие го променија дресот. Не е важно кој е претседател на ФФМ, туку важно е тоа што законот не се почитува“, вели Мојсовски.