Убедлива победа на Вардар пред дербито со Пелистер

24 октомври 2026 - 18:51

Шампионот на Македонија, Вардар продолжува да доминира на домашната сцена! Скопските „црвено-црни“ славеа на гостувањето кај Прилеп со убедливи 38-29 и ја запишаа осмата победа од исто толку натпревари во македонската Суперлига.

Избраниците на Иван Чупиќ ја завршија задачата во Прилеп и со полн плен ќе влезат во периодот што може да има големо значење за продолжението на сезоната. Пред Вардар се два сериозни предизвика – последниот натпревар од групната фаза во Лигата на шампионите против Мелсунген и потоа големото дерби во домашното првенство против Пелистер.

Иако важеше за фаворит, Вардар во првото полувреме не успеа да се одлепи значително. На паузата гостите имаа предност од 16-14, но во продолжението го засилија ритамот и покажаа зошто се меѓу главните кандидати за највисок пласман. Клучниот момент се случи кога Вардар водеше со 25-22. Следуваше серија од пет последователни погодоци, со која резултатот се искачи на 30-22 и практично беше решено прашањето за победникот. До крајот, гостите рутински ја одржуваа предноста и стигнаа до конечни 38-29.

Најефикасен во редовите на Вардар беше Јака Малус со 11 гола, додека Урош Митровиќ постигна осум погодоци. Значаен придонес имаше и голманот Васил Гогов, кој запиша 14 одбрани. Кај домашниот тим, Никола Шипинкоски беше најдобар стрелец со седум гола.