Птици го прекинаа мечот на Медведев, но не го спречија убедливо да победи!

Рутинската победа на седмиот носител, сепак, беше одбележана со несекојдневен инцидент кој предизвика краток прекин на играта. Најнеобичниот момент се случи кон средината на вториот сет кога две птици слетаа директно на мрежата. Иако играта продолжи уште неколку удари, главниот судија одлучи да го прекине разигрувањето и нареди поенот да се преигра.

Оваа судиска одлука предизвика фрустрација кај Медведев, кој сметаше дека веќе го освоил поенот со успешен дијагонален форхенд точно во моментот кога беше означен прекинот.

„Ова е многу лошо“, му порача Русинот на судијата веднаш по донесената одлука.

По завршувањето на дуелот, Медведев, кој првиот сет го доби за само 21 минута и брзо го врати ритамот по прекинот, многу посмирено ја коментираше ситуацијата. Тој инцидентот го смести меѓу петте најлуди работи што му се случиле на терените во Њујорк.

„Ги видов птиците веднаш и помислив дека поенот експресно ќе биде прекинат, но тоа не се случи. Продолживме да играме уште 45 секунди и точно кога го удрив победничкиот удар, судијата ни рече да застанеме. Помислив: 'Зошто сега?' Не бев задоволен од одлуката, но тоа е ситуацијата и ништо не можеш да направиш“, изјави Медведев на прес-конференцијата.

И покрај бизарната пауза, рускиот тенисер потенцираше дека е задоволен од својата форма.

„Го сакам овој терен. Среќен сум што победив и што останувам уште малку во Њујорк“, заклучи тој.