Шок во Пекинг: Сабаленка елиминирана од 49. на ВТА листата

04 октомври 2024 - 12:55

Арина Сабаленка направи голем чекор назад во борбата за првото место на ВТА листата откако денеска доживеа пораз од Каролина Мучова во четвртфиналето од Мастерсот во Пекинг.

Мучова е 49. светска тенисерка во моментов, но не се исплаши од славната противничка и ја победи со 2-1 во сетови, во меч кој траеше 2 часа и 48 минути. Првиот сет го доби во тајбрејк, вториот го загуби со 2-6, во третиот два пати беше во негатива со загубен брејк (0-2 и 2-4), но со четири гема по ред успеа да се врати и да дојде до победата.

Сабаленка имаше голема шанса да стигне на само 300 бода разлика во однос на Швјонтек, но сега разликата меѓу нив е над 1.000 бода и тешко дека ќе успее да ја претекне до крајот на сезоната до која има уште само еден месец. Мучова во полуфиналето ќе игра со подобрата од дуелот меѓу Андреева и Женг кој е н а програмата во моментов.