Ц. Звезда се тепа да игра во Евролигата од која сезонава нема да добие ниту едно евро!

29 мај 2024 - 14:53

Екипата на Црвена звезда периодов на сите полиња се „тепа“ да остане дел од Евролигата, иако сезонава од ова натпреварување нема да добие ниту едно евро, како од наградниот фонд така и од ТВ правата.

Со завршувањето на фајналфор-турнирот во Берлин со триумф на Панатинаикос, во јавноста излегоа сумите кои екипите ги добиваат како бонус. Зелените од Атина заработија најмногу и тоа 1,75 милиони евра, додека поразениот во финалето, екипата на Реал Мадрид, доби 990.000 евра. Следуваат Олимпијакос (870.000 евра), Фенербахче (750.000 евра) и Барселона со 640.000 евра. Ова се буквално смешни суми со оглед на буџетите на овие тимови кои се движат од 20 до 40 милиони евра.

Партизан како 11-то пласиран доби 350.000 евра, додека Ц. Звезда не доби ништо бидејќи наградниот фонд ги опфаќа тимовите до 14 место, а црвено-белите завршија како 16-ти. Српските екипи не добиваат пари ниту од ТВ правата, кои се загарантирани само на 11. екипи со А лиценца.