Радуловиќ со куп-трофејот влезе во историјата на макбаскетот!
Тој е само петтиот стратег во макбаскетот кој триумфирал во куп-натпреварувањето и како играч и како тренер. Радуловиќ во својата ризница има две куп-победи со Никол Ферт, а една со Фени индустри, на кои сега ја придодаде оваа тренерската со МЗТ Скопје. Најтрофеен меѓу нив е Јорданчо Давитков, кој има три пехари како играч, а четири како тренер.
„Задоволството ги покрива сите нервози и стресови од изминатите денови. Во соблекувалната на играчите им кажав дека ако имаме повеќе од 20 поени во транзиција – победувавме. Ние имавме 26 и тоа е тоа. Во комбинација со добра одбрана и секако агресивна игра на целиот терен“, ја коментира финалната победа над Работнички (77-69) предводникот на аеродромци.
Пред Радуловиќ е уште една можност дополнително да влезе во елитно друштво во својата професија, ако со МЗТ Скопје дојде до титулата, со што ќе им се приклучи на Давитков, Рајковиќ, Јончевски и на Ѓорѓи Кочов, кои се единствени досега што почуствувале шампионско славје и како играчи и како тренери.