Работнички ептен се измачи за да го победи вториот тим на МЗТ (ФОТО)
Работнички имаше многу добар старт на натпреварот, па до средината на првата четвртина изгради предност од 11-2, која растеше и 19-8, но вториот тим на МЗТ не се предаваше, па намали на само четири поени преку Наумоски на пет минути пред завршувањето на првото полувреме. Сепак, Бундовиќ и Питс ја одржуваа предноста на Работнички, која на паузата изнесуваше осум поени (40-32).
МЗТ блесна во третата четвртина и влезе во одлична серија, која им помогна да го свртат резултатот во своја корист и по третата четвртина да имаат водство од 60-57. Во последниот дел од мечот се водеше голема борба на паркетот, но Работнички го скрши отпорот на ривалот на три минути пред крајот и потоа со мирен финиш стигна до триумф од 84-77.
Најдобар во екипата на Работнички беше Демиер Питс со 32 поени, четири скокови и четири асистенции, додека кај МЗТ најефикасен беше Максим Митевски со 17 поени, четири скокови и шест асистенции.