Награда за добрите резултати: Илиевски уште две години на клупата на Пелистер!
Потпишувањето на новиот двегодишен договор денеска беше официјализиран од страна на зелено-белите, кои сезонава во плејофот влегуваат од втората позиција и во полуфиналето ќе ги одмерат силите со Еуро Никел.
„За мене најголема победа изминативе две години во кои сум на клупата на Пелистер е препознавањето на публиката на тоа што го работиме, со оглед што клубот стана фактор во македонската кошарка и сите имаат респект кон тоа што се работи во Битола. Заслужуваме да играме финале, а и градот заслужува таков успех. Како што градот препозна и ни дава целосна поддршка, верувам дека и тие што постојано нè критикуваат, ќе продолжат да нè критикуваат, бидејќи тоа ни дава уште повеќе мотиви во плеј-офот“, изјави Илиевски.
Веста за продолжување на соработката со тренерот ја потврди и спортскиот директор на зелено-белите, Мартин Јовановски.
„Одамна си ги знаеме плановите и патот по кој треба да се движиме, а незамисливо е тој процес да продолжи без човекот кој го изгради составот со кој е во самиот врв на македонската кошарка. Со продолжувањето на договорот со Илиевски за уште две сезони покажуваме стабилност и амбициозност. Се надевам дека оваа вест ќе ги израдува вистинските љубители на кошарката и своето задоволство ќе го покажат на нашите натпревари во спортската сала 'Боро Чурлевски' во Битола“, рече Јовановски.
Пелистер првиот полуфинален меч од серијата против Еуро Никел ја почнува в петок на домашен терен.