Македонските тренери добиваат шанса да учат од легендарниот Светислав Пешиќ!

Дводневната едукација ќе се одржи на 24 и 25 август во Скопје и е задолжителна за сите македонски тренери, бидејќи присуството претставува еден од основните услови за добивање тренерска лиценца за сезоната 2026/27. Пешиќ зад себе има повеќе од четири децении успешна тренерска кариера и важи за еден од најтрофејните и највлијателни европски кошаркарски стручњаци. Тој е член на Куќата на славните на ФИБА, европски и светски шампион со репрезентации, освојувач на Евролигата и тренер чие име е синоним за врвни резултати и кошаркарска експертиза.

За време на клиниката, искусниот стратег ќе ги пренесе своите знаења и искуства преку стручни предавања, на кои македонските тренери ќе можат одблизу да се запознаат со современите тренерски принципи, методологијата на работа и филозофијата што го направија еден од најценетите кошаркарски авторитети во светот.