Барсегјан: И Фенербахче беше многу силен па го победивме!
Вардар има максимален ефект на домашен терен летово, победувајќи ги Малме (3-1), Копенхаген (1-0) и Фенербахче (2-0) на патот кон историскиот меч. Вардарци сега се подготвени за уште еднаш да покажат дека заслужено играат на големата сцена и најавуваат дека ќе дадат сè за да остварат позитивен резултат.
„Ерменскиот Хулк“, Тигран Барсегјан даде два гола во квалификациите и посакува добрите резултати во Скопје да продолжат.
„Низ досегашните натпревари во Европа, покажавме дека имаме добар тим и дека можеме да се носиме со секого. Особено на домашен терен каде што остваривме три победи во исто толку натпревари. Се надеваме дека таа серија ќе продолжи и против Зенит. Играме против многу силна екипа, но така беше и со Фенербахче, па ние победивме и на двата натпревари. Во Скопје заедно со нашата публика, можеме да направиме уште еден голем резултат“, вели Барсегјан.
Тој ги повика сите навивачи на црвено-црните да ја исполнат Националната Арена и да им дадат ветер во грб на играчите на дебито против фаворизираниот противник, кој на ждрепката беше во првиот шешир.
„Повеќе публика, тоа подобро за нас. Тие се нашиот 12-ти играч, ни даваат мотив да играме и да се претставиме во најдобро издание. Ние ќе им се оддолжиме со максимална игра и се надевам на крајот со победа. Дојдовме до групната фаза и сега треба да мислиме како да освоиме што повеќе бодови во натпреварите кои претстојат. Исто така во овој натпревар влегуваме во добра серија од пет победи која се надеваме и посакуваме да продолжи“, додава Ерменецот.