Вардаровото дете Јасир Асани замина на печалба во Ј.Кореја за вкупни два милиони долари

07 декември 2022 - 15:52

Вардаровото дете Јасир Асани, кој преку школата на црвено-црните експлодира во првиот тим, но се откажа да игра за Македонија за да го носи дресот на Албанија, си замина од унгарскиот вицепрвак Кишварда, каде беше еден од најдобрите фудбалери и кариерата ќе ја продолжи во – Јужна Кореја.

Асани, со посредство на македонскиот менаџер Александар Јовков, потпиша за Гвангжу во корејската лига и од јануари ќе игра во првенството на осминафиналистот од СП после година ипол во унгарскиот шампионат, вкупниот трансфер изнесува два милиони долари.

Асани, покрај дресот на Вардар, играше и за Шкупи, Победа, албански Партизани и шведски АИК Стокхолм, а беше младински македонски репрезентативец, селектиран во „златната генерација од Еуро 2017“, но реши да игра за западниот сосед.

Асани сега ја чека визата за да замине за Кореја и да ги мине лекарските прегледи пред официјално да го потпише договорот и да биде официјално промовиран.

„Мислам дека завршив добра работа во изминативе година ипол, посебно зашто излеговме на меѓународна сцена. Среќен сум што дадов голем придонес во остварување на целите и секој фудбалер има обврска да помогне да се остварат тие цели, а ако е тоа успешно, знали дека сте ги оствариле и личните цели и тој успех ве турка погоре во кариерата, што се случи со мене во случајов. Сакам да им заблагодарам на сите навивачи за поддршката кон мене и кон тимот, знам дека ќе им недостигам. Тие направија да се чувствувам во Кишварда како дома. Сега овој клуб има еден навивач повеќе, а мене ме чека нов предизвик од кој не се плашам“, рече Асани.