Федерер призна: Не го испочитував доволно Ѓоковиќ

12 јуни 2024 - 10:16

Еден од најдобрите тенисери на сите времиња Роџер Федерер ја призна големината на Новак Ѓоковиќ која во последниве 15 години често беше проблематизирана.

Голем дел од љубителите на тенисот и новинарите беа и се против Србинот, но на залезот на неговата кариера се гледаат квалитетите со кои располага. Сега тоа го призна и Федерер.

„Мислам дека не му го укажав респектот кој го заслужува поради неговите технички маани. Мислев дека има екстремно цврст стисок при форхендот, додека неговиот бекхенд не беше флуиден како што е денес. Потоа ги 'испегла' тие работи и стана неверојатно чудовиште од играч.

Претпоставувам дека Новак ја расипа журката на навивачите на Рафа и Роџер. Кога тој излезе на површина многумина сметаа дека не им треба трет човек бидејќи се среќни со нас двајца. Потоа тој се истакна со силната личност и неверојатната желба да победи по секоја цена“, рече Федерер.

Ѓоковиќ во меѓувреме ги собори речиси сите рекорди во тенисот и на 37 години може да се пофали дека е поуспешен, во однос на трофеите од своите двајца големи ривали.