Шпанците сакаа да завршат со атракција, но на крај загубија од Норвешка

22 јануари 2026 - 19:39

Ракометарите на Норвешка со триумф од 35-34 против Шпанија ја почнаа втората фаза од Европското првенство (ЕП), а вистинска драма се случуваше во последните секунди од натпреварот.

Норвешка и Шпанија понудија возбудлив ракомет од самиот старт на мечот, а на средината резултатот беше израмнет (10-10). Потоа Шпанците направија исчекор и поведоа со 12-10, но Норвежаните возвратија и стигнаа до 15-13. Сепак, на паузата се замина со нерешен резултат (16-16).

Шпанија го имаше водството во првиот дел од второто полувреме (28-26), но Норвешка влезе во ритам и постојано до завршницата водеше со по еден погодок.

Во последните 11 секунди се случуваше вистинска драма, откако Норвешка остана со двајца ракометари помалку на теренот, а Шпанија се обиде со атракција да го заврши мечот и да освои бод, но на крајот се посрамоти и го загуби дуелот.

Фото: EPA