Дејан Милосављев во Вардар е – трансфер на сезоната!

На истекот од сезоната 2018/19, се сумираат резултати, успеси, киксови, а во позитивниот дел од топ-листите во очи падна едно познато име. Според специјализираниот ракометен портал „Хендбол планет“, Дејан Милосављев се покажа како најдобриот играч купен минатото лето.

Милосављев дојде во јули од Партизан, како 22-годишен талент со намера да биде потпора за Страхиња Милиќ. Но, откако популарниот Џамбо и Вардар тргнаа по посебни патеки, на Милосављев му падна в скут огромна одговорност, но истовремено и шанса да блесне. Тој ја искористи максимални и девет месеци подоцна е прв фаворит за најдобар голман во сезоната во Лигата на шампионите.

„Хендбол планет“ смести уште еден вардарец високо на својата топ-листа со најдобри 25 трансфери. Тоа е Сташ Скубе, кој дојде од Пик Сегед како избркан, а сега е еден од најважните фактори за пласманот на црвено-црните во Келн. Го држи четвртото место на оваа листа, зад Милосављев, Бенјамин Буриќ и Артем Каралек.

На листата е и Глеб Калараш, рускиот пивот на Вардар, кој дојде од Магдебург, а тука се и имињата, кои заминаа во обратна насока, Лука Циндриќ од Вардар во Кјелце и Вања Илиќ од Металург во Ла Риоха.