Васоски: Без оглед каков играчки кадар имаме, Вардар ќе оди на - титула!

08 јануари 2019 - 13:21

Македонскиот вицешампион Вардар денеска ги започна подготовките за пролетниот дел од оваа сезона во која црвено-црните повторно влегуваат со подмладен тим, зашто на првата екипа се приклучени низа младинци, има едно засилување во Бразилецот Жуниор и повратникот Бојан Колевски (Борец), а петмина странци го напуштија клубот.

Црвено-црните цела есен мака мачеа со финансиите, па ограничениот буџет сега ќе треба рационално да се искористи да се пронајдат уште неколку засилувања за пролетниот дел во кој Вардар не се откажува од битката за шампионската титула. Црвено-црните заостануваат пет бода зад Шкендија.

„Вардар има една цел - тоа е шампионска титула! Без разлика со каков играчки кадар ќе влеземе во пролетниот дел. Втора цел ни е излез во Европа, без која сезоната би била катастрофална. Ако останеме сите здрави и ако имаме среќа да ги погодиме засилувањата, мислам дека можеме да ја освоиме титулата“, вели тренерот Александар Васоски.

Вардар тргна во подготовките со низа промени во играчкиот погон, а главната фаза на подготовките ќе ја одработи во Аланија (Турција), каде најтрофејниот клуб ќе замине на 16 јануари

„Од оваа гледна точка, во клубот сите остануваат што имаат договор. Новак и Битанг добија по еден ден повеќе одмор, Попов не е на тренинг затоа што уште е повреден. Горе-долу тој е ростерот, со тоа што повикавме неколку деца од младинскиот погон со кои ќе работиме и ќе ги селектираме до понеделник, околу планот кој ќе патува на подготовки. Имаме и пикирани засилувања, но за нив ќе работиме во од. Жуниор веќе го имаме потпишано, за други играчи нема, но ќе се знае понатаму. Херанц, Јуфо и Максимов најверојатно ќе го напуштат клубот, не се повикани на подготовки, но прво да почекаме на официјализација“, вели Васоски.

Голем проблем во вториот дел од есента беше реализацијата, но Вардар нема да бара нов напаѓач, иако ги нема Барсегјан и Максимов, кои не се повеќе во клубот

„Го имаме Лира, го имаме и Ибиши, најверојатно ќе го вратиме и Колевски, мислам дека во нападот сме коректно пополнети. Повеќе би сакал некое крило, затоа што имаме крила од друг тип во Вардар. Повеќе ни се потребни крила кои знаат да даваат и голови“, додава Васоски.

Црвено-црните во Аланија веќе договорија две контролки и тоа со Черно Море и со Александрија, а во следниот период треба да се договорат уште низа контролки за што подобра подготовка на тимот за стартот на сезоната која почнува на 17 февруари со дерби за титула против Шкендија во Тетово.