Дедо Мраз дојде и во Вардар – сметката деблокирана, почна исплатата на долговите!

01 јануари 2019 - 14:45

Најтрофејниот макеоднски клуб Вардар по шест месеци во блокада, повторно може нормално да работи со својата сметка, која беше одблокирана во изминативе денови, што е голема вест за црвено-црните и за навивачите дека состојбите во клубот полека ќе почне да се средуваат и дека до крајот на овој месец ќе се избегне суспензијата од УЕФА.

Вардар се најде во проблем откако дисциплинското тело на УЕФА условно го суспендираше Вардар на две години забрана за играње во Европа, ако до 31 јануари не ги врати долговите заклучно со 30 септември лани, плус казнувајќиги црвено-црните со 100.000 евра за прекршување на правилникот од финансискиот фер-плеј. Вардар веќе шест месеци работеше со блокираната сметка, едвај успеа да плати котизација, фудбалерите речиси да играа бесплато...

Но, во новата 2019 година, црвено-црните влегуваат со деблокирана сметка, со исплатени две плати и со најава дека до крајот на месецот ќе се средат сите документи и дека во УЕФА ќе биде приложено тоа што се бара, покриени долгови за да не се добие суспензија и Вардар на лето да не смее да игра во Европа. Одблокираната сметка е добредојдена и за најавите дека со низа засилувања на актуелниот погон, Вардар на пролет ќе тргне во атак на шампионската титула сооглед дека само пет бода е заостатокот на најтрофејниот клуб зад актуелниот првак Шкендија.

Вардар се најде во сериозен финансиски проблем летоска по елиминацијата од Пјуник во првото квалификациско коло во Лига Европа, по што сметката на клубот беше блокирана од Акционерското друштво за стопанисување со станбен и деловен простор (АДССДП) и со таква блокада црвено-црните работеа во изминатата полусезона, а едвај платија котизација за настап во Првата лига.

Вардар иа долгови кон поранешни фудбалери, кои беа дел од историската генерација, која играше групна фаза во Лига Европа, а им должи плати и на фудбалерите и вработените за оваа сезона, откако имаше авансна исплата пред еден месец.