Панчев: Овој успех е пример дека може да играме често во Европа!

Популарната „кобра“ посочи дека доста нервозно ги следел двата дуели со Фенербахче.

„Ми беше полесно кога играв, сега бев напнат, нервозен. Ни се укажа шансата да направиме изненадување, со оглед на тоа ако објективно ги анализираме, Фенербахче е Реал Мадрид на овие простори. Апсолутно најдоминантен клуб во последните две децении и никој не очекуваше вакво нешто. Но, пласманот е апсолутно заслужен. Имавме фантастична тактика и одлична игра во двата меча, а јас во прв план ги ставам тренерот и играчите, кои се најзаслужни за историскиот успех. Драго ми е дека успеавме, затоа што Македонија долго чекаше на овој успех. Јас цвсто стојам на земја и веднаш му кажав на газдата (Самсоненко – н.з.) дека ова ни е пример како да биде за понатаму, дека може секоја година или секоја втора година да имаме успех. Да не чекаме сега 25 години пак на ваков успех. Ние размислуваме со Чеде за следните пет години да бидеме уште посилни. Ова е само почеток, треба да размислуваме само позитивно. Само со работа и добри потези да играме пак во Европа. Сепак, да не очекуваме и правиме притисок дека мора секоја година да сме во групна фаза, но секоја втора би било премија“, рече Панчев.

Легендата на црвено-црните потенцира дека не знае кој се му честитал на Вардар, потенцирајќи дека за него најважна е радоста на навивачите на клубот.

„Мене ми е најважно да добиеме честитки од нашите навивачи, многу ми е гајле кој се ни честита. Сигурно честитале, тие честитки доаѓаат во канцеларија“, додава Панчев.

Спортскиот директор потенцира дека преодниот рок е завршен за Вардар затоа што со доаѓањето на Србинот Вања Марковиќ е пополнета квотата за странци.

„Ние ја имаме пополнето квотата на странски играчи и задоволни сме од сите тие што се дојдени. Ќе видиме за понатаму за тимот да биде уште посилен. Ќе се насочиме кон идните цели. Спировски во јануари му завршува договорот, разговаравме за продолжување. Тој изрази желба да проба нешто ново и тоа го прифативме. Му посакавме среќа. Беше коректно да го пуштиме. Затоа и реагиравме веднаш и го донесовме Вања Марковиќ. Други засилувања нема, пополнета е квотата од осум странци“, вели Панчев.