Почина Аце Стиков, доајенот на македонското спортско новинарство!

Стиков со својот препознатлив глас ги овековечи најважните спортски настани во македонската и југословенската спортска историја, и со преку 2000 преноси е новинарот со најмногу изговорени минути на програмата на македонското радио. Остави неизбришлив белег во македонското спортско новинарство, во 42-годишната кариера известуваше од седум Олимписки игри, од кош шест од Летните игри, од безброј фудбалски мечеви, од Универзијада до медитерански игри, шаховска олимпијада, кошаркарски, ракометни, одбојкарски мечеви, како и преноси во бокс, борење, атлетика, хокеј, кајак, зимски спортови...

Стиков беше последниот претседател на здружението на спортски новинари на Југославија и еден од основачите на Македонскиот олимписки комитет. Добитник е на бројни награди и признанија, вклучувајќи го и престижниот Трофеј за спорт и медиуми од Меѓународниот олимписки комитет во 2004.

Како уредник на Спортската програма на Македонското радио создаде плејада новинари и репортери. Во 1969 година ја основа најдолговечната специјализирана спортска програма Спорт, музика, спорт и известуваше од седум Олимпијади и голем број европски и светски првенства.

Погребот на посмртните останки ќе биде во петок (22 септември 2023 година) во 11.00 на градските гробишта Бутел во Скопје (капела во 10.00), а комеморативната седница во понеделник (25 септември 2023 година) во 11.00 во просториите на Македонската радио-телевизија.