ТФТ: АБА не ни ја призна регистрацијата на Американците - навредени сме!

Тоа беше големо изненадување за сите кои го следеа мечот, а по мечот тренерот Боро Смилковски призна дека е силно разочаран од АБА и ги објасни причините за она што се случуваше во Мејдан.

„Девет години сум тренер на ТФТ, долго време учествуваме во АБА, многу ни е дадено, ама и ние многу дадовме и никогаш не сме направиле проблем. Она што се случи денеска е многу чудно. Постои платформа на АБА на која се регистрираат играчите, а ние имаме доказ дека сите играчи кои се дојдени овде се регистрирани. Лесно е да се провери на официјалниот сајт на АБА лигата. Правилата на АБА велат дека право за регистрација на играчите има до ден пред натпреварот, а ние го направивме тоа во саботата.

На денешниот натпревар, делегатот извади едно ливче кој го добил од АБА и на кое не беше нашите Американци. За моите стандарди, нонсенс објаснување дека овој натпревар е одложен и дека требала да се игра на 14 октомври што не е точно. Знаете што се случуваше претходниот период, нашата група беше со пет екипи, сега е со четири и добивме некој нов распоред. Упатствата од нашиот клуб беа да не излеземе на терен, но поради публиката, поради Слобода Тузла како организација, а најмногу поради тоа што играчите што не добија дозвола за настап побараа да, сепак, се игра.

Она што можам да кажам е дека веќе подготвуваме некои правни рамки за оваа одлука, но најмногу не боли тоа што немаше елементарен респект кон нас. Најголема победа за нас денеска е тоа што ниеден играч не се повреди. Можам да ви покажам докази дека ние не сме добиле никакво соопштение дека некој нема право на настап. Поминавме 700 километри и се чувствуваме навредено“, рече Смилковски.

Слобода победи со 106-51 и со триумф ја отвори новата сезона, додека ТФТ во следниот период ќе треба да се консолидира и да се рестартира пред продолжението од сезоната.