Вечното дерби нема да се игра во „новиот“ Градски парк – ќе го нема ниту на телевизија!

Градоначалникот на Центар, Горан Герасимовски, пред локалните избори еуфорично најави дека новиот „храм на кошарката“ ќе биде отворен со едно од најголемите дерби-дуели во македонскиот спорт, но очигледно работите не се довршени навреме. Неодамна беше објавена фотографија како се монтира паркетот, трибините веќе се готови, но очигледно е дека Работнички и неговите навивачи ќе почекаат да се вратат во својот децениски дом, барем до вториот дел од сезоната.

Дополнителен удар за армијата фанови на двата најголеми противници во баскетот е и информацијата дека средбата нема да биде пренесувана на телевизија, туку од оваа рунда е предвидено во живо да оди мечот меѓу Кожув и Куманово. Ова значи дека квалитетно следење на мечот ќе биде можен само од трибините во „Кале“, или, пак, преку интернет-стримот, кој во оваа сала неретко е тешко гледлив со оглед што една од навивачките групи мавта со знамиња токму пред камерите.