УЕФА поради Торцида ќе го премести полуфиналето на младинците на Хајдук во Женева

21 март 2023 - 20:29

Завршницата од младинската Лига на шампиони и фајнлфорот се игра во Нион, седиштето на европската куќа на фудбалот УЕФА, ама европската централа го премести едното полуфинале, на сплитски Хајдук со Милан на стадионот во Женева, поради најавената инвазија на Торцида.

Околу 5.000 навивачи на Хајдук беа во Дортмунд на четвртфиналната пресметка, а сега се најавуваше уште масовно гостување, па проблем е што стадионот во Нион не може сите да ги прибере, зашто станува збор за стадионче со капацитет од 4.000 гледачи и поради тоа УЕФА начелно донела одлука да го однесе мечот во Женева, 30 километри оддалечена од Нион.

Таму стадионот на кој се играа мечеви од Еуро 2008 е со капацитет од 30.000 гледачи и Торцида ќе може во огромна бројка да дојде, а проценките барем засега од Сплит се дека се очекуваат и до десет илјади навивачи на Хајдук, сосе емиграцијата на Хрвати во Швајцарија, Австрија, Германија, Франција...

Дефинитивна одлука за преместувањето на мечот треба да има утре. Полуфиналните мечеви се на 21 април, а второто полуфинале е АЗ Алкмар – Спортинг Лисабон. Финалето е на 24 април