Надвор поларно, на стадионот пролет: Вардар ќе игра на плус 20 степени!

23 ноември 2017 - 11:05

Македонскиот шампион Вардар вечерва од 19 часот ќе го одигра петтиот свој меч во дебитантската сезона во Лига Европа и тоа на гости во Санкт Петербург, кај веќе пласираниот Зенит, кој уште во минатото коло обезбеди пролетни елиминации во второто по ранг натпреварување.

Руската зима вардарци ја почувствуваа на вчерашниот тренинг на „Петровски“. Во Санкт Петербург е поларно навечер, а дуелот е од 21 часот по руско време. Но, фудбалерите нема да имаат мака за да играат добар меч, затоа што на стадионот „Крестовски“ ќе биде – пролет!

Зенит објави дека стадионот, кој има подвижен кров ќе биде затворен, поради поларните температури, па на стадионот условите за игра ќе бидат идеални – 20 степени целзиусови. Сето тоа нуди доолнително уживање не само за фудбалерите, туку и за гледачите на стадионот. Вардар ќе има поддршка од 30-на приврзаници на стадионот, објави Зенит.

Сега останува само вардарарци да го одиграат својот најдобар меч и да успеат да се изборат за први бодови во групата, особено што Зенит најверојатно ќе игра со комбиниран тим и најголемите ѕвезди ќе ги чува за дербито во руското првенство со Спартак Москва викендов.