Добриот старт носи напредок: Македонија ќе се врати на најдобриот пласман од 2010 година!
Македонија со четири бода тргна во евроквалификацискиот циклус, па добриот старт донесе напредок повторно на 68-то место, позиција со која црвено-жолтите ја завршија минатата година и која беше најдобар пласман на нашата селекција од август 2010 година наваму. Репрезентацијата на почетокот на оваа година падна за три места на 71-та позиција, па сега повторно се враќа на 68-то место, откако освои седум рејтин-поени плус со победата против Летонија со 3-1 и ремито со Словенија 1-1. Сега 68-то место ќе го делиме со Гвинеја со по 1.350,37 рејтинг-поени.
За поголем напредок и за приближување кон историски најдобриот пласман од 46-то место во октомври 2008 година (селектор беше Среќко Катанец), на Македонија ќе и требаат и тоа како добри резултати од следните два квалификациски мечеви со фаворитите во групата Полска и Австрија во јуни. Победи од тие дуели многу извесно е дека ќе донесат далеку поголем скок на листата.
Полска и покрај двете победи во нашата квалификациска група ќе остане на 20-то место, но Австрија по очајниот старт со два порази ќе назадува дури 11 позиции и тоа до 33-та позиција. Израел со четирите бода ќе напредува за осум позиции до 84-то место, за разлика од Словенија која со две ремија ќе остане на 63-та позиција. Аутсајдерот Летонија, пак, ќе патне за две места на 133-то место.
На врвот на листата Белгија ќе остане на врвот пред Франција и Бразил, а Англија ќе скокне на четвртото место на сметка на Хрватска која ќе биде петта. Уругвај ќе ја прескокне Португалија, а топ десет ќе го затворат Швајцарија, Шпанија и Данска.