Јунајтед му дава 10 милиони фунти на Мегваер само да си оди од „Олд Трафорд“

02 јуни 2023 - 07:40

Англискиот великан Манчестер јунајтед планира да му даде 10 милиони фунти како отштета на англискиот репрезентативец Хери Мегваер, само тој да си замине од „Олд Трафорд“ летово, откако катастрофалните настапи го чинеа првотимско место, а и не е по вкус на менаџерот ерик Тен Хаг.

Мегваер е најскапиот светски дефанзивец кој во Јунајтед дојде во 2019 година од Лестар, но сезонава играше како стартер само на 16 меча од вкупно 61 и според најавите стоперот е веќе на излезна врата, а неколку италијански калчолигаши добиле понуда да го ангажираат.

Тој има уште две години од договорот на „Олд Трафорд“ и 190.000 фунти неделна плата, па Јунајтед за да ја забрза работата за да го откачи сега планира да го искешира со 10 милиони фунти и на тој начин да ја заврши работата за да ослободи место за уште едно дефанзивно засилување за новата сезона.

Мегваер е дел од списокот на Герет Саутгејт за претстојните јунски евроквалификациски мечеви меѓу кои е и пресметката на „Гордиот Албион“ со Македонија на 19 јуни, токму во домот на Манчестер јунајтед.