Гачевски: Пет бода не се многу, очекувам титула со Вардар!

Вардар повторно претрпе низа промени во ростерот, тимот е млад, но желен за успеси, а Гачевски како еден од најискусните посочи дека очекува на крајот да се радуваат на шампионската титула.

„Моите очекувања се - одиме на титула. Тоа е нашата цел. Има уште многу мечеви за играње. Сите знаеме дека дуелот во февруари во Тетово против Шкендија е многу важен, имаме млад тим, но мислам дека ќе се носиме добро. Не чекаат подготовки во Аланија, треба добро да ги направиме сите напори за да се спремиме добро за првиот меч. Не би можел да кажам дали Вардар има тим за титула, затоа што не знаеме уште кој ќе дојде. Но, ние претходно покажавме дека сме солиден состав, долго време бевме лидери. Но, тој нерегуларен гол во дербито против Шкендија влијаеше на нас психолошки и паднавме. Но, верувам дека можеме да се вратиме. Пет бода не е многу“, вели Гачевски.

Гачевски зимава се поврзуваше со трансфер во ЦСКА Софија, чии скаути уште есеноска го гледаа.

„Останувам и понатаму во Вардар. Тука сум на тренинг“, кратко одговори Гачевски за опцијата да си замине од црвено-црните.