Блажевски си замина од Тирана, се мисли помеѓу Македонија, Кипар и Израел

03 јануари 2019 - 14:37

Поранешната вардарова „деветка“ Дејан Блажевски по шест месеци ја прекина соработката со албанскиот прволигаш Тирана и зимава крилниот фудбалер е слободен и бара нов ангажман.

Блажевски летоска потпиша договор со Тирана, откако си замина од Вардар како еден од многуте членови на историската генерација која доминираше во македонскиот фудбал и напиша историја со настапите во групната фаза во Лига Европа (даде еден прекрасен гол во Санкт Петербург).

Сега по шест месеци кај западниот сосед Блажевски повторно бара нов клуб, а има три опции, да се врати во Македонија или да бара странски ангажман во Кипар и во Израел, каде тамошни клубови се заинтересирани да го донесат во своите редови.

Од македонските клубови, Работнички, кој најави сериозни амбиции не само пролетва туку и во следната сезона и Вардар се екипите кои се најзаинтересирани за офанзивниот фудбалер. Ова посебно важи за Вардар, кој нема многу голем избор во нападот, па враќањето на популарниот Шиле би било идеално за црвено-црните.