Ален Рустемовски и Катерина Попева најдобри спортисти за 2025 година!

29 јануари 2026 - 22:23

Боксерот Ален Рустемовски и бодибилдерката Катерина Попева ги добија највисоките признанија на традиционалната манифестација „Спортист на годината 2025“, која вечерва се одржа во организација на Министерството за спорт и Сојузот на спортски федерации на Македонија.

На свеченоста присуствуваа бројни спортисти, спортски легенди и претставници на федерациите, а меѓу гостите беа и премиерот Христијан Мицкоски, ресорни министри и претставници на локалната самоуправа. Рустемовски до признанието „Спортист на годината“ стигна по освојувањето на сребрен медал и вицешампионската титула на ЕП У23 во Ереван. Во изборот, тој беше подобар од номинираните Енис Барди, Стефан Михајловски, Андреас Трајковски и Владимир Егоров.

Во женска конкуренција, титулата најдобра спортистка ѝ припадна на Попева, која лани стана шампионка на Светското првенство во фитнес и бодибилдинг во Санта Сусана (Шпанија). За признанието беа номинирани и Ангела Мојсовска, Александра Марковска, Катерина Ацевска и Сашка Колеска.

Министерот за спорт Борко Ристовски им честиташе на добитниците и номинираните, истакнувајќи дека упорноста, дисциплината и љубовта кон спортот се клучот за успех, како и дека институциите ќе продолжат со поддршка на врвниот спорт и спортската инфраструктура. Годинешното издание на „Спортист на годината“ беше 71-во по ред, со што манифестацијата уште еднаш ја потврди својата традиција и значење за македонскиот спорт.

ДОБИТНИЦИ НА ПРИЗНАНИЈА „СПОРТИСТ НА ГОДИНАТА 2025“:

Спортист на годината: Ален Рустемовски (бокс)

Спортистка на годината: Катерина Попева (бодибилдинг и фитнес)

Најуспешен млад спортист: Адријан Рустемовски (бокс)

Најуспешна млада спортистка: Даниела Алексовска (бразилска џиу-џица)

Најуспешен женски национален тим: Ракометна репрезентација на Македонија (сениорки)

Најуспешен машки национален тим: Одбојкарска репрезентација на Македонија (сениори)

Најуспешен тренер/селектор: Могамед Ибрагимов (борење)

Најуспешна спортска федерација: Џудо федерација на Македонија

Најуспешен спортист со инвалидитет: Андреј Стојановски (пливање)

Најуспешна универзитетска екипа: Машки тим во мал фудбал – УКИМ

Најуспешен средношколски клуб: СУГС „Никола Карев“ – Скопје

Најуспешен основношколски клуб: ООУ „Никола Карев“ – Кочани

Плакета за постигнати резултати како талентиран млад спортист доби пливачот Петар Цеков.