Реконструирано мултифункционално игралиште на кејот на Вардар кај Луна Парк! (ВИДЕО)

Проектот денеска го промовираа министерот за спорт, Борко Ристовски и градоначалникот на Скопје, Орце Ѓорѓиевски, кои посочија дека станува збор за дел од програмата за изградба и реконструкција на спортската инфраструктура, реализирана во соработка со локалната самоуправа. Според министерот Ристовски, ваквите проекти имаат за цел спортот да биде подостапен за граѓаните, особено за младите, и да се поттикне активен и здрав начин на живот.

„Со секое ново или обновено спортско игралиште испраќаме јасна порака – спортот мора да биде блиску до младите. Нашата обврска како институции е да создадеме услови во кои децата и младите ќе изберат спорт, здрав живот и тимски дух. Министерството за спорт ќе продолжи со инвестиции во спортската инфраструктура, затоа што таа е темел за развој на спортот и на здраво општество“, изјави Ристовски.

Реконструираниот простор на кејот на Вардар содржи игралиште за одбојка на песок, како и фудбалско и кошаркарско игралиште со современа полипропиленска подлога, што овозможува побезбедни и поквалитетни услови за спорт и рекреација.