Одбојкарите од државата бараат иста премија како фудбалерите – по 10.000 евра од играч!

20 јануари 2021 - 13:32

Претседателот на Одбојкарската федерација на Македонија (ОФМ), Петар Јовановски заедно со играчите Ристо Николов и Владо Митев, денеска беа примени од директорот на Агенцијата за млади и спорт (АМС), Наумче Мојсовски, по успешниот настап во квалификациите и пласманот на следното ЕП.

Одбојкарите заблагодарија за приемот и поддршката и на директорот му порача дека од Владата очекуваат да им доделат иста премија како на фудбалерите, кои за пласман на ЕП оваа година земаа по 10.000 евра од член на селекцијата односно вкупно 430.000 евра.

„Би сакал да се обратам директно до Владата. Ако сме рамноправни спортисти со сите, тогаш би сакал и одбојкарите од државата да ја добијат иста награда каква што добија фудбалерите за пласман на Евро 2021“, изјави Јовановски на денешната средба.

Во моментов е сигурно дека одбојкарите ќе добијат 20.000 евра премија од ОФМ.

„Наша желба е како сите останати федерации да имаме свој дом и се надевам дека во скоро време ќе го реализираме тоа. Долго време бев спортист и знам што значи да се игра за репрезентација. Ќе сторам сѐ спортистите да имаат добри услови за тренинг, да имаат свое место каде што ќе го поминуваат време за време на секој собир“, дополни Јовановски.