„Словенија ќе ни каже како понатаму, прво место или едвај пласман во втора фаза!“

13 јануари 2018 - 12:21

Македонските ракометари го почнуваат Европското првенство во Хрватска со големи мотиви, со желба да ги обноват убавите спомени од СП 2009 исто така во Хрватска и од ЕП 2012 од Србија. И сега, како и тогаш, илјадници Македонци ќе дојдат да ги бодрат своите миленици, а тогаш е најлесно да се игра.

Играчите внимаваат и не се залетуваат со најави за високи пласмани или некакви медали, а единствена причина за тоа е мечот со Словенија. Да помине тој и ќе ни се разбистри сликата. Филип Миркуловски потсети дека Словенците не ни се баш најпогоден противник, но тоа ќе биде само мотивација плус за нашите момци.

„Многу важен натпревар, не само што е отворање на Европското првенство, туку со овој натпревар ќе го видиме и понатамошниот тек на нашите амбиции. Доколку победиме можеме да играме и за прво место во групата, а доколку загубиме ќе мора да се задоволиме само со пласман понатаму, ако тоа воопшто ни се случи. Имаме големи мотиви и негативен скор против Словенија, но ова е друго е Европско првенство, друго натпреварување. Ќе дадеме максимум од себе и се надевам на позитивен резултат“, вели искусниот плејмејкер на македонската репрезентација.

Натпреварот со Словенија се игра вечерва во 19.30 часот, а тие влегуваат како јасни фаворити, откако на СП во Франција, минатиот јануари, стигнаа до бронзен медал. И на тоа натпреварување игравме во иста група, а Словенците нѐ декласираа со 29-22.