Ракометарите со пораз од Турција ги почнаа Медитеранските игри

23 јуни 2018 - 18:25

Македонската ракометна медитеранска селекција со пораз го започна настапот на овие Игри, кои вчера беа официјално отворени, откако денеска во воведниот меч загубија од Турција со 26-29.

Селекцијата која ја предводи помошникот на Раул Гонзалез во македонската селекција, Роберто Гарсија Парондо во најголем дел од мечто беше во негатива, која почна со серијата на Турците со 3-0 по водството на Македонија со 6-5. И таа негатива од два гола постојано тлееше до крајот на полувремето (13-15), а лошиот почеток на вториот дел ги одведе на минус пет (13-18), по што македонските ракометари до крајот сè што направија беше со серија од 3-0 да се приближат на достижните два гола (16-18), но немаа сила за пресврт.

До крајот Турците ја одржуваа предноста, на десет минути до крајот имаа четири позитива (20-24), а Македонија само уште еднаш успеа да стигне на два гола негатива и тука застана за на крајот Турците да се радуваат на победата со 29-26

Мартин Поповски и Филип Кузнамовски со по седум гола беа најефикасни, а Мартин Велковски со пет беше единствена сериозна поддршка на овој двоец. Дорук Пехливан со десет гола беше незапирлив кај турскиот тим и најдобар стрелец на мечот.

Следен меч на машката селекција на овие Медитерански игри е утре од 16.30 часот против Египет.