Ракометарите се „опарија“: РФМ им исплати 40.000 евра за пласманот на СП!

18 јули 2018 - 12:05

Македонските ракометни репрезентативци добија сериозно зголемување на трансакциската сметка, откако Ракометната федерација на Македонија (МКФ) денеска им ја исплати премијата од 40.000 евра за пласман на Светското првенство (СП), кое в година ќе се одржи во Данска и во Германија.

Жолто-црвените до ракометниот Мундијал дојдоа по подобриот вкупен скор во бараж-двомечот со Романија во кој прво победивме со 32-24, а потоа минимално загубивме на реваншот во Клуж (25-26).

Ова ќе биде шесто учество на ракометарите на светските првенства, по настапите во Египет (1999), Хрватска (2009), Шпанија (2013), Катар (2015) и Франција (2017), а вкупно единаесетто учество на големите натпреварувања.

СП во Данска и Германија ќе се игра следната година во периодот од 10 до 27 јануари, а Македонија своите натпревари од групната фаза ќе ги игра во Минхен во Германија, каде што за противници ќе ги има селекциите на Шпанија, Хрватска, Исланд, Бахреин и Јапонија.