Македонските надежи завршија четврти во Бугојно

21 април 2019 - 20:13

Македонската репрезентација за ракометари до 19 години со пораз го заврши пријателскиот турнир во Бугојно, БиХ. Во натпреварот за трето место, загубивме од Германија со 24-25.

Ова е втор пораз од Германците, со кои игравме и во групната фаза. За разлика од тој натпревар, кој го загубивме со 24-31, овој пат македонските надежи се држеа докрај во натпреварот, сепак без конечен успех. 

Изедначеното прво полувреме заврши со 11-11, а првите 10 минути од вториот дел почнаа одлично за Македонија, па дури имавме и водство од 17-13. Сепак, Германците се вратија, успеаја и да поведат и да ја сочуваат кревката предност до крајот.

Симоноски беше најефикасен во македонскиот тим со седум гола, по пет постигнаа Серафимов и Костески. Ова беше турнир кој покажа дека македонската селекција од 2000 година работи, созрева, се носи со врвните селекции од Европа и со право може да бара висок пласман на кадетското СП, кое летово ќе се одржи во нашата земја.