Сега му е мајката Вардаре: Кил без Сагосен, Вајнхолд и без Винчек!
Кил има проблеми со отсуства и во составот вечерва ќе нема тројца важни играчи: еден од најдобрите светски ракометари во последните шест години, Сандер Сагосен, десниот бек Штефан Вајнхолд и „тепачот“ во одбраната Патрик Винчек. Не е дека Кил нема оружје во својот репертоар, тоа и понатаму е застрашувачки состав со Дувњак, Рајнкинд, Пекелер, Ландин на голот...меѓутоа би требало да е за нијанса полесно кога тренерот Филип Јиха ќе остане краток за ротација.
Кај Вардар се враќа Борко Ристовски, па поради тоа Али Сафар излезе од составот, а останатите 15 се најподготвените и најдобрите во моментов. Веселин Вујовиќ зборуваш со комплименти за играта во Алборг, без разлика што Вардар загуби. Посакува да ја повторат посветеноста и концентрацијата од поголемиот дел од тој натпревар, бидејќи без тоа не можат да се надигруваат со ривал како Кил.
Ова е идеален момент да се земе скалпот на „зебрите“ и затоа што наредија неколку слаби резултати и во Лигата на шампионите и во Бундеслигата. Во неделата загубија во домашното дерби со Магдебург и тоа на домашен терен, со 27-29, а во последните пет меча имаат уште три нерешени исхода (Пик Сегед, Лемго и Фуксе Берлин) и само една победа, против Загреб.
Во Лигата на шампионите го држат третото место во групата А, со седум бода, два повеќе од Вардар, кој е петти. Затоа, победа би значела враќање во конкуренција за врвот во групата и отворање на полесен пат во остатокот на сезоната.