Писонеро ќе мора да се откаже од големото засилување за натпреварите на Супер Глоуб

19 август 2019 - 14:12

Европскиот ракометен шампион, акипата на Вардар се соочува со неколку проблеми пред стартот на ИХФ Супер Глоуб во Саудиска Арабија. Покрај повредените Толедо и Стоилов, тренерот на „црвено - црните“, Хозе Писонеро ќе мора да се откаже и од услугите на Павел Атман за првиот голем настан во сезоната.

Имено, Атман не настапи на контролниот натпревар со Еурофарм Работник кој се одигра денеска во Скопје, а на трибините се појави со бандажиран прст.

Средниот бек од Хановер дојде во Вардар ова лето и треба да биде искусна алтернатива за Скубе на среден бек, а по потреба да игра и како лев бек. Македонската публика го памети како еден од клучните ракометари во редовите на Металург.