Металург го одмина корона-бранот, сите здрави тргнаа кон Цирих
Бранот на коронавирус, кој го зафати македонскиот ракомет, очигледно, ги одмина ракометарите на Металург. Целата екипа, стручниот штаб и раководството направија задолжителни тестови пред тргнувањето за Цирих и резултатите се негативни.
Екипата денеска се упати кон Истанбул, а оттаму утре ќе замине кон крајната дестинација. Натпреварот против Криенс се игра во вторник во 18.45 часот, а Металург во него ќе влезе со предност од два гола, со победата од Скопје, со 26-24.
Металург требаше да одигра првенствен натпревар од Суперлигата во четвртокот, против екипата на Работнички, но два дена претходно таа пријави 15 позитивни ракометари на Ковид-19. Со тоа бројката на заразени ракометари во нашето првенство дојде до 50-тина.