Манасков и Веспрем ја урнаа Барса и му одмогнаа на Вардар!

По првото коло, само вторпат сезонава Барселона се соочува со пораз во Лигата на шампионите, а голем дел од заслугите има и македонскиот репрезентативец Дејан Манасков. Тој беше еден од четворицата најефикасни во тимот на победникот, со по четири гола, заедно со Мае, Тонесен и Ненадиќ.

Лидерот во групата водеше некаде до 15. минута од мечот, а потоа Веспрем направи серија од четири постигнати и само еден примен гол и поведе со 13-10. Барса успеа да се врати на „нула“, со 15-15 на паузата, меѓутоа во второто полувреме ниту еднаш не поведе. Изедначи на 22-22 во 45. минута, но кога Унгарците поведоа со 28-25 во 54. јасно беше дека нема да ја пропуштат шансата.

Веспрем дојде до 14 бода, еден помалку од Вардар и тоа токму пред нивната меѓусебна пресметка во Скопје идната сабота. Во друга ситуација би рекле дека ова е позитивен резултат за Вардар, бидејќи лидерот пред него загуби, но аспирациите за првото место згаснуваат со фактот дека Барса до крајот има два домашни меча и еден на гости кај Монпелје, така што тешко дека ќе ја испушти таа привилегија.

Во вториот меч од групата А, Монпелје го совлада Мешков Брест со 29-23 и ги сочува шансите, барем, за шесто место во групата, кое носи во осминафиналето. Сега има пет бода, колку и Мешков пред него и Кристијанштад зад него.