Еурофарм работник замина во историјата со победа во ЛШ!
Како мало искупување за сите пропуштени шанси, прокоцкани победи и нереализирани водства, Еурофарм работник славеше над Бидасоа со 25-23. Шпанскиот тим, можеби, не играше во полна сила, имајќи предвид дека го осигура првото место во групата Ц уште минатата рунда, но не изгледаше таков резултатот во првото полувреме.
Бидасоа наметна контрола и утврди едно константно водство во првиот дел кое изнесуваше 9-5 некаде пред 15. минута, а во финишот на првиот полчас и највисоки 15-10. Меѓутоа, Еурофарм имаше одличен финиш, со серија 4-0, потпомогната и од голманот Градимир Чаневски, така што на пауза замина со 14-15.
Во вториот дел битолчани не дозволија да им се повтори грешката, па побрзаа да ја преземат контролата од противникот и во изедначена размена на погодоци, сепак тие беа тимот, кој почесто водеше. Во 50. минута имаа ретко водство од плус два (22-20), Шпанците се вратија и од тоа, сепак на крај немаа решение за Владислав Остроушко, кој се јави како спасител на Еурофарм работник, со два гола во завршницата.
Остроушко беше и најефикасен кај домаќините, со осум гола од 12 обиди, по четири постигнаа Никола Маркоски и Милан Ѓукиќ, додека Чаневски одбрани 9 удари, од кои шест во првиот дел. Прв стрелец на мечот беше Руди Сери од Бидасоа, со девет гола.
Дури и со третата победа и со вкупно шест бода, Еурофарм завршува последен во групата Ц, само поради послабиот меѓусебен однос со фински Кокс, кој исто така има 6 бода. Бидасоа како прва, Спортинг како втор продолжуваат во плејоф за осминафиналето.
ТАБЕЛА група Ц: Бидасоа Ирун 15, Спортинг 14, Савехоф 12, Татран П. 7, Кокс 6, Еуорфарм Р. 6.