Вардар ептен се намачи за да дојде до бодовите кај Охрид!

19 септември 2021 - 20:14

Ракометарите на Вардар далеку потешко од очекувањата ја продолжија победничката серија во домашното првенство, откако вечерва славеа на гостувањето кај Охрид (31-29).

Црвено-црните мораа максимално да се испотат за да дојдат до бодовите против мотивираните „рибари“, кои ниту еден момент не се предадоа, а на десетина минути пред крајот дојдоа на негатива од само еден гол (24-25). Но, на крајот пресуди искуството и несомнено поголемиот квалитет на гостите, кои потоа умешно го однесоа мечот во „мирни води“.

Тимур Дибиров со осум и Филип Талески со пет гола беа најпрецизни во таборот на Вардар, додека кај Охрид се истакнаа Шилегов со шест и Додиќ и Милошевиќ со по пет гола. Вардарци, како и Пролет и Еурофарм Пелистер, имаат три од три и со максимален учинок го чекаат дербито со битолчани, следната сабота во СЦ „Јане Сандански“.