Новиот тренер на Вардар: Со англискиот немам мака, ама македонскиот - многу тежок јазик!

Ваљадолид е неговиот прв клуб како тренер, почнувајќи од 2017 година. Тој е легенда на оваа екипа бидејќи има поминато 10 сезони во неговиот дрес во 90-тите и во раните 2000. Вели дека е човек, кој верува во работа и има високи цели.

„Мислам дека во Ваљадолид покажав дека не сум некој нервозен тип, туку човек кој размислува на големи цели и верува во секојдневната работа. Овде во клубот тоа го почитуваа, се надевам дека така ќе биде и во Македонија. Знам дека ова е највисокото можно ниво, знам дека ќе биде тешко, но тоа е. Јас ќе одам и ќе се обидам да го одржам гладот за успеси на таа екипа, желбата да победуваат. Да се обидам ја добијам довербата на таа екипа. Секако дека ќе биде тешко, но тоа е единствениот начин да се напредува“, вели Писонеро.

Притисокот е голем, не само што доаѓа во актуелниот европски шампион, туку и затоа што неговите претходници, исто така Шпанци имаа прво тренерско искуство во Вардар - ја освоија ЛШ. Ќе треба да ги наследи Раул и Парондо и во една друга работа - македонскиот јазик.

„Немам проблеми со англискиот јазик во моментов, но со македонски...уф...малку потешко. Ги видов на телевизија Раул и Парондо како зборуваат и не ми изгледа лесно. Но сето тоа доаѓа природно, важно е ние со ракометарите да се разбираме и да работиме на терен“, дополни Писонеро.